ياغيش
دونن آخشام چاغي سنسيز مني آغلاتدي ياغيش
ياديما سالدي سني مطلبينه چاتدي ياغيش
كوچه لر اولدي گوزومده یئنه بير آرپا چايي
مني سنسيز نئجه نيسگيل سئلينه آتدي ياغيش
اؤدو سوندورمه سويون قايداسيدي آمما دونن
كؤزه رن كؤنلومو ياغديقجا اَلو لاتدي ياغيش
يادا سالدي اؤ ياغيشليق گونو كي اوندا مني
كَپنَك تك باشينا شوقيله اويناتدي ياغيش
بو خاغيندان آخاراق بيلدي شيرينليك شانيسان
گول اوزوندن سوزولوب بال فَرَه سين داتدي ياغيش
دوداقين قيرميزي گوللر كيمي آچميشدي سنين
سوزوله ن وقت اؤ دوداقلاردا قانا باتدي ياغيش
اؤ قدر مستيديم هئچ بيلمه ديم آخير نه زمان
سينه م اوسته ساريلان تئللري ايسلاتدي ياغيش
اينجه ياپراق تك اَسيب قوينوما گيردين اؤشودون
شَكَري گؤر نه مَهارتله دوزا قاتدي ياغيش
دامجي دامجي سنه لاي لاي دئدي قوينومدا منيم
نه دئييم بلكه سني كؤرپه يه اؤخشاتدي ياغيش
صورا بيلديم آپاريب قورد گئچينين شَنگولوسون
سني مندن آليب آنجاق مني آللاتدي ياغيش
دونن آخشام گئنه بير سودا دا گوردوم كي منه
آجيليقلا او شيرين خاطيره ني ساتدي ياغيش
اويانيرديم كي باشيم دَيدي ملامت داشينا
مني رؤيادان آيتماقدا اؤزي ياتدي ياغيش
مصطفی عزتی :منبع:انجمن ادبی ورزقان